مسحت تطبيقات متابعة مصاريفي كلها… وفكرت إني بكده هرتاح

في يوم عادي، مسحت كل تطبيقات متابعة مصاريفي من على موبايلي.

مش كان عندي خطة. زهقت وعملت حاجة.

أول كام يوم كانوا كويسين فعلاً. مفيش إشعارات، مفيش أرقام بتتسجل، مفيش إحساس إن في حاجة بتحاسبني على كل جنيه بصرفه. حسيت ان دماغي أخف شوية.

بس الراحة دي ما كملتش.

لقيت نفسي مش فاهم

بعد أسبوعين تقريباً، جيت في اخر الشهر مش عارف فلوسي راحت فين. احاول افتكر صرفت في ايه واحسب بس بردو مفيش فايدة. كل مرة قلت "مش مهم" أو "أكيد حاجة بسيطة"، اتراكمت عليا من غير ما احس.

المشكلة مش اني بطلت أتابع.

المشكلة إني بطلت أشوف.

وفيه فرق.

مرتاح ولا مش شايف؟

الراحة الحقيقية مش إنك متعرفش، الراحة إنك عارف ومش مضغوط. إن عندك صورة كافية من غير ما تحس إنك بتتحاسب على كل حاجة.

ده اللي كنت بدور عليه، وماكنش موجود لا في التطبيق ولا في إني أمسحه.

جربت الطرفين:

- التطبيق اللي بيسجل كل حاجة: بتحس إنك تحت محاسبة يومية وما تقدرش تتنفس وبتعاتب نفسك علي كل قرش

- الفوضى التامة: بتاخدك في آخر الشهر متفاجئ من غير ما تعمل حاجة غلط

ولا واحد فيهم ريّحني فعلاً.

اللي اشتغل معايا

في الأخير بنيت حاجة بسيطة في Notion،مش لأنه الحل المثالي، لكن لأنه الوحيد اللي قدرت اخصصه لاحتياجاتي مش زي التطبيقات الي بتفرض عليا مميزات محدودة.

مجرد صفحة أشوف فيها الصورة الكبيرة من غير ما أغرق في أرقام يومية. بسيط كفاية إني أفضل أشوف وما أبوظش.

ده اللي كان ناقص من الأول، مش تطبيق أحسن، مجرد وضوح كافي.